Mas nangin maduagon pa gid ang pangalan sang “nation’s girl group” nga BINI sa OPM history matapos nangin labing-una ini nga P-Pop act nga naka-perform sa entablado sang KCON music festival.
Ini nga kahiwatan ang ginakilala nga pinakadaku nga K-pop fan and artist festival sa kalibutan kun sa diin nagaserbe man nga global launchpad para sa K-pop artists kag platform para sa international exposure.
Hulyo 28 (Philippine Time), naghugyaw gid ang audience sang nagsaka na ang BINI sa Crypto.com Arena sa Los Angeles, California kag ginpakita ang ila electrifying performance sang ila latest single nga “Cherry on Top” kadungan sang pre-show sang prestihiyoso nga “M Countdown”.
Suksok sang grupo ang stylish Y2K-inspired outfits nga kaangay man sa ila ginasuksok sa ila nga music video.
Ang BINI isa ka eight-member girl group — sanday Jhoanna, Aiah, Colet, Maloi, Gwen, Stacey, Mikha, kag Sheena — apang wala nakaupod ang ila leader nga si Jhoanna bangud sa hinali nga problema sa ikaayong lawas.
Matandaan nga may three-day concert ang BINI sang Hunyo kag ginabantayan naman sang fans ang Grand BINIverse nga sunod patigayunon sa Araneta Coliseum sa November 16 kag 17.
