Ginpangunahan sang Phoenix Suns star nga si Kevin Durant ang Team USA sang ginlutos sini si Nikola Jokic kag ang Serbia, 110-84, sa imbukada nga hampang sa Group C sa men’s basketball sa Paris Olympics.
Wala naka-upod si KD sa duha ka mga practice kag tune-up games antes ang Summer Games bangud sa iya anay ginsuprer nga calf injury, apang nangin impresibo ang hulag sini batok sa Serbians matapos nagpaulan sang 23 points kun sa diin 21 diri ang halin sa first half.
Sa una nga duha ka quarters, 58-49 ang skor pabor sa USA antes ginpasagunsunan sang dies puntos nga abanse sa third frame, 26-16.
Naka-21 puntos naman si LeBron James, siyam ka assists, pito ka rebounds kag isa ka steal sa iya ikaapat na nga stint sa Summer Games.
Si Jokic naman ang nagpanguna sa Serbia nga may 20 points, eight assists, five rebounds, kag four steals, samtang nagdugang si Bogdan Bogdanovic sang 14 points.
Talalupangdon nga ginbangko sa bilog nga hampang sang US ang duha gid lamang ka players — si Tyrese Haliburton, kag ang bag-o lang nagkampyon sa NBA nga si Jayson Tatum sang Boston Celtics.
Sa iban pa nga basketball games, ginlutos sang Canada ang Greece, 86-79 (sa Group A); samtang naghimo sang maragtas ang South Sudan sang ginpierde sini ang Puerto Rico, 90-79 (Group C).
(Photo by Gregory Shamus/Getty Images)
