ILOILO CITY- Gin-anunsyo sang Philippine National Police (PNP) nga ginbalik na sini ang security detail ni Senator Bong Go matapos nga gin-recall agud magpaidalom sa refresher training.
Una na ginpahayag ni Go nga ginkakasan siya sang security detail antes pa man ginkakasan sang 75 police officers si Vice President Sara Duterte gikan sa iya nga security team.
Ginpahayag man sang senator nga nabalaka siya sa pagkadula sang iya security team bangud sa mga threats kag risgo sa iya kabuhi bilang senador.
Ginpahayag naman ni PNP spokesperson Police Colonel Jean Fajardo nga ang Police Security and Protection Group nag-recall sa tanan nga protective security personnel kasunod sang nagtuhaw nga isyu ga may mga pulis nga nadakpan nga nagapatigayon sang moonlighting.
Sang Mayo, duha ka Special Action Force police officers nga gin-deploy kuntani sa Zamboanga, ang nadakpan nga nagaserbe bilang bodyguards para sa isa ka Chinese citizen nga nagaistar sa isa ka exclusive residential village sa Alabang, Muntinlupa City.
Nag-isyu naman si PNP Chief Police General Rommel Francisco Marbil sang directive nga nagapahanumdom sa mga police officers nga magtutok sa public safety kag indi sa paghatag sang serbisyo sa mga pribado nga mga indibidwals.
