Nag-abante na sa quarterfinals sa Paris Olympics 2024 ang Pinay boxer nga si Nesthy Petecio matapos ginlutos ang pambato sang host nation nga si Amina Zidani sa round-of-16 sang women’s 57kg weight class.
Apisar naalangan sa imbukada nga round kun sa diin nag-skor ang judges pabor sa French boxer, nakabawi si Petecio kag gin-domina na ang ikaduha nga round paagi sa maayo nga mga kumbinasyon.
Duha-duha pa ang kapalaran sang Pinoy pride sa third round sang nakatupa ang mga sumbag ni Zidani kag nagdistansya na sa iya, apang nakapangita si Petecio sang paagi nga makasulod ang left straight samtang manugtapos na ang sambuwa.
Apat ka judges ang nag-skor pabor sa Pinay (30-27, 29-28, 29-28, 29-28) samtang isa naman ang nag-skor sang 29-28 pabor sa home bet.
Mapait ini nga kalutusan sa 30-anyos nga si Zidani nga amo ang third seed sa division kag amo pa ang matunog nga gina-suportahan sang home crowd sa North Paris Arena pasado ‘las dos subong nga kaagahon oras sa Pilipinas.
Matam-is naman ini nga kadalag-an sa Tokyo Olympics silver medalist nga si Petecio nga may misyon nga madala-pauli ang gold medal subong nga tuig.
Pananglitan magdaog pa gid sa masunod nga round, sigurado na ang medalya para kay Petecio. Balantayan siya sa Domingo sang gab-i batok kay Xu Zichun sang China nga nagdaog via split decision batok sa Colombian sixth seed nga si Valeria Arboleda Mendoza.
Sang Martes sang gab-i, una nga napagkit ni Petecio ang iya kadalag-an sa Paris batok sa mas mataas kag mas bataon nga si Jaismine Lamboria sang India.
