ILOILO CITY – Apat ka tuig na matapos natabo ang ‘Iloilo Strait Tragedy’, apang preska sa gihapon sa paminsaron sang isa ka survivor ang natabo nga trahedya ng ginkamatay sang 31 ka mga tawo.
Matandaan nga sang Agusto 3, 2019, Sabado nga adlaw, ginhampak sang pugada ang mga pumpboat nga MB Chi-chi, MB MB Keziah2, kag MB Jenny Vince.
Ang MB Chi-chi may karga nga 40 ka mga pasahero kag apat ka crew, ang MB Keziah 2 sakay ang 5 ka crew.
Samtang ginapatigayon ang rescue operation, makaligad lang ang masobra duha ka oras, nagkulob man ang pumpboat nga MB Jenny Vince sakay ang masobra 30 ka pasahero, kag apat ka crew.
Sa interview sang Bombo Radyo kay Charrie Edang, residente sang Barangay Igdarapdap, Nueva Valencia, Guimaras kag manunudlo sa Cabalagnan Elementary School, iya ginpahayag nga gulpi lang ang paghampak sang pugada sa iya ginakasyan nga pumpboat.
Suno kay Edang, sang amo nga tion, ginpanumdom sini ang pito ka bulan niya nga anak, rason nga nagtinguha ini nga makaluwas.
Ginpahayag sini nga sang nakapuli siya sa ila balay, naghingyo siya anay sa iya pamilya nga indi siya pag-istoryahon bangud sa trauma nga iya naagyan.
Apang sa ulihi, ginpakamaayo ni Edang nga mag-move on agud matutukan sini ang iya pamilya.
Sa subong, ginakabig naman ni Edang nga ikaduha na sini nga kabuhi matapos nakaluwas sa trahedya.
