Sa ikaduha nga tion sa Paris Olympics 2024, nakanta kag napabati sa bilog nga kalibutan ang national anthem sang Pilipinas nga “Lupang Hinirang” matapos nagkampyon liwat sa gymnastics si Carlos Edriel Yulo ukon ang “Golden Boy” sang pungsod nga si Caloy Yulo.
Nagpangibabaw ang 24-anyos nga Filipino gymnast sa iya specialty apparatus nga vault isa ka adlaw matapos nabulsa man sini ang gold medal sa isa man sini ka pet event nga amo ang floor exercise.
Ini na ang ikatatlo nga bulawan nga medalya sang Pilipinas sa bug-os nga maragtas sang Olympiada matapos una nga nagkampyon si Hidilyn Diaz sa weightlifting sang Tokyo OIympics 2020.
Sa vault finals nga nagsugod pasado ‘las dies kagab-i, ikaapat nga nag-perform ang Pinoy pride kag anay world champion kun sa diin naka-skor ini sang kabug-usan nga 15.116 points sa duha ka vaults.
Una sini gin-perform ang Ri Se Gwang kag naka-skor sang 15.433 kag ginsundan sang Kasamatsu double twist nga may yara naman sang 14.800 points.
Wala pa sang kasiguruhan sang amo nga tion kun mangibabaw si Yulo bangud ginahulat ang performance sang ulihi nga gymnast nga si Artur Davtyan sang Armenia nga isa man ka former world champion kag Tokyo silver medalist.
Nagpakita si Davtyan sang matinlo nga executions sa duha ka vaults apang naka-tally lamang sang 14.966 nga amo ang naghatag sang kumpirmasyon nga kampyon liwat si Yulo sa amo nga event.
Nangin bronze medalist ang Armenian samtang pangatlo naman sa ranking si Harry Hepworth sang Great Britain nga may 14.949 samtang nagpang-apat naman ang Pinoy-British gymnastics ace nga si Jake Jarman (14.933) nga nagtiglawas man sang Britanya.
Ini nga Olympiada ang ginakabig nga redemption sa Pinoy pride nga tumandok sang Malate, Manila matapos nga nagsarurot ini sa ginakabig pinakamanubo nga punto sang iya karera halos isa ka tuig na ang nagligad sang wala gid ini sang nabulsa nga bisan isa nga medalya sa World Artistic Gymnastics Championships.
As of writing, apat na ang medalya sang Pilipinas sa Paris Games — duha ka Yulo, kag sigurado naman sa bronze medals ang Pinay boxers nga sanday Nesthy Petecio kag Aira Villegas kag may tyansa pa nga mahimo nga silver ukon gold.#
