Nasiplatan ang isa ka Chinese research vessel sa Recto Bank (Reed Bank) kasunod sang inadlaw sini nga pag-explore sa reefs kag shoals sa nakatundan sang Palawan.
Suno kay retired U.S. Air force officer Ray Powell, director sang maritime transparency initiative nga SeaLight, ang 74-ka-metros nga barko sang China nga Ke Xue San Hao ang nagsulod sa nabagatnan nga bahin sang Recto Bank sang 10:30 p.m. sang Huwebes.
Ang Recto Bank isa ka underwater reef formation nga ginapatihan may huge reserves sang oil kag natural gas kag nahamtang 85 nautical miles halin sa Palawan.
Sulod ini sa exclusive economic zone sang Pilipinas apang wala pa gihapon ini nabenepisyuhan sang pungsod bangud sa kahimuan sang China.
Base sa 2013 report halin sa United States Energy Information Administration, ini nga Reed Bank ang ginapahayag nga makaunod sang 5.4 billion barrels sang langis kag 55.1 trillion cubic feet sang natural gas.
Suno kay Rear Adm. Roy Vincent Trinidad, Philippine Navy spokesperson for the West Philippine Sea, makaduluda ang hulag sang Ke Xue San Hao sa dagat sang Pilipinas bangud naga-zigzag ang patter sini, indi diretso, nga buot silingon suno sa iya, malain gid ang intension.
Pahayag pa sini, nagapakig-angot na ang Philippine Navy sa Philippine Coast Guard kag sa Department of Foreign Affairs kaangot sa amo nga Chinese research vessel kag wala sang tuyo suno sa iya nga palalaon pa ang sitwasyon.
Ini nga vessel sang China ang na-detect man anay nga naghalin sa military base sang mga Chinese sa Panganiban Reef (Mischief Reef) sang Hulyo 26 kag naglabay sa critical locations kaangay sang Ayungin Shoal, Raja Soliman Shoal, Bulig Shoal, Hasa-Hasa Shoal, Abad Santos Shoal, kag Escoda Shoal sa West Philippine Sea.
