Nakahingagaw-balik ang Estados Unidos sang Amerika sa pinakaibabaw nga pwesto sang medal tally inoras antes ang closing ceremony sang Paris Olympics 2024.
Nahimo ini paagi sa nangin makahalawat-hawat nga hampang sang women’s basketball team sa tunga sang Team USA kag host nga France.
Diutayan lang nakahimo sang isa sa makabig all-time Olympic upsets ang French basketball players apang napunggan ini sang Americans kag nakuha ang kadalag-an sa isa gid lamang ka puntos, 67-66. Ini na ang ila ikawalo nga sunod-sunod nga Olympic gold sa women’s basketball kag amo man ang ika-40 nga gold medal sang US sa medal table sa Paris Games.
Pareho ini nga numero sa 40 ka bulawan nga medalya sang China apang may 44 silver ang US kag 27 lamang ang China. May 126 medals overall man ang Americans ipaanggid sa 91 sang mga Chinese.
Ini na ang ika-apat nga sunod-sunod nga Olympiada nga nagpangibabaw ang USA.
Nagpangatlo sa medal tally ang Japan nga may 20 ka golds — pareho man sa ila pwesto sa Tokyo 2020.
Ini naman ang best-ever medal haul sang Australia nga nagpang-apat nga may 18 golds, samtang nagpangalima naman ang host nga France nga may 16 golds nga amo ang ila best result halin sang 1900 sang sila man ang nag-host sang Olympics.
