Ginpasakaan sang Bureau of Internal Revenue sang tax evasion complaint si suspended Bamban, Tarlac Mayor Alice Guo.
Ini ang kasunod man sang paandam sang bureau nga pasakaan nila sang kaso ang si Guo sa tion nga indi magsanto ang income nga gindeklarar sini sa balor sang iya mga propedad.
Nahibaluan nga nagapanag-iya si Guo sang pila ka mga malahalon nga salakyan santo man sa mga dokumento nga natipon ni Sen. Risa Hontiveros, chairperson sang Committee on Women, Children, Family Relations and Gender Equality.
Apang gin-athag ni Guo nga ang nasambit nga mga salakyan ang wala na niya ginapanag-iyahan kag kabahin sang buy-and-sell business sang Westcars, sa diin nagaserbe ini nga incorporator.
Gin-ako naman sang alkalde nga may yara ini sang piggery, meat shop, farms, kag embroidery business.
Ginpahayag sang 37 anyos nga alkalde nga nakaangkon ini sang negosyo bangud sa bulig sang iya amay nga nagapanag-iya sang fabric kag embroidery business sa China.
