Ginpasalig sang Department of Trade and Industry (DTI) nga nagatrabaho ini kaupod sa Bureau of Customs (BOC) sa tunga sang na-report nga influx sang imported substandard kag peke nga appliances nga ginabaligya online.
Suno kay DTI Undersecretary Amanda Nograles, ini nga appliances ang ginapadala halin sa foreign seller direkta sa consumer kag isa ka paglapas sa pagsulundan sang ahensya nga dapat mag-apply anay ang electric appliances para sa Philippine Standard (PS) license ukon Import Commodity Clearance (ICC) sticker antes ibutang sa market.
Bangud diretso ini sa nagbakal suno kay Nograles, indi na ini ma-check sang maayo sang ahensya. Kalabanan sa sini nga substandard appliances ang naghalin sa China suno pa sa opisyal.
“Mula sa datos, sa mga reports, kapag ang consumer bumili sa online ng isang electrical appliance, diretsyo na ‘yan, papasok ng Pilipinas, lalapag sa warehouse dito. From that warehouse, ide-deliver ‘yan ng courier diretsyo sa consumer. Given that pattern, hindi na po nakakapasok ang DTI pagdating sa pagche-check kung talagang may PS mark ‘yan o ICC sticker,” pahayag sini.
Diri nagasulod ang Customs suno sa natungdan bangud sa idalom sang mandato sang amo nga ahensya ang pag-import kag pag-export sang mga produkto halin sa iban nga mga pungsod.
Nagpahanumdom man ang ahensya sa publiko nga indi safe gamiton ini nga electrical appliances nga wala sang PS kag ICC sticker.
Nagpakig-angot naman ang trade and industry sa social media giant nga Facebook kag sa iban pa nga online shopping platforms kaangot sa substandard appliances bangud may yara sila sang commitment nga i-delete ang items sa sulod sang 24 hours kasunod sang take down order.
Sa Kamara naman, nag-file si Deputy Majority Leader Erwin Tulfo sang resolution agud magpanawagan sa imbestigasyon sa “offshore appliances” halin sa China bangud madamo nga Pilipino ang nagakadulaan sang trabaho bangud sini.
