Gin-anunsyo sang state electricity company sa Lebanon nga indi na ini makahatag sang suplay sang kuryente bangud nahubsan na sang fuel reserve ang katapusan sini nga operational power plant.
Pahayag sang kumpaniya, ini nga sitwasyon ang magaapekto pati sa importante nga mga pasilidad kaangay sang airport, pantalan, water pumps, sewage systems, kag mga presuhan.
Halin Sabado sang udto suno sa kumpaniya, nagresulta na ang problema sa total power cut sa state electricity sa bilog nga Lebanon.
Nag-abiso naman ang south Lebanon Water Corporation sa mga tawo nga magkinot gid sa tubig bangud apektado man sang blackout ang ila abilidad nga mag-pump sang tubig nga kinahanglanon sang mga pumuluyo.
Kinaandan ang state electricity blackouts bangud sa fuel shortages sa mga pungsod nga nagasalig lang sa generators para sa power; apang ini nga kaso sa Lebanon ang natabo sa tunga sang kahangawa nga matabo ang all-out war sa tunga sang Hezbollah kag Israel.
Nahibaluan nga ini nga militante nga grupo kag ang militar sang Israel ang naga-intanay na kag naga-engkwentruhanay halin sang natabo ang Gaza war sang Oktubre 2023.
Sang nag-gyera man ang duha ka nasambit nga grupo sang 2006, lakip sa gin-atake sang Israel amo ang fuel storage tanks sang Lebanon.
Ang total blackout ang natabo man matapos nagpalupad ang Hezbollah sang rockets sa Israel bilang pagtimalos sa sa Israeli strike nga nagpatay sa 10 Syrian nationals kag nagpilas sa lima ka iban pa sa South Lebanon.
Linibo na ka Israelis kag Lebanese ang nagbakwit kasunod sang cross-border nga inaway.
Mangin ang embahada sang Pilipinas ang nag-abiso man sa mga Pinoy nga magbiya na sa Lebanon nga magbiya na samtang bukas pa ang mga airport. Ang kutob sang indi makabiya ang gina-rekomenda man nga magsaylo sa mas safe nga mga lugar sa guwa sang Beirut, South Lebanon, kag Bekaa Valley.
