Nakapauli na sa Pilipinas subong nga weekend ang 15 ka overseas Filipino workers (OFWs) kag tatlo ka kabataan halin sa Lebanon kag ginalauman nga ma-repatriate man ang 45 ka iban pa sini nga semana.
Suno kay Migrant Workers Secretary Hans Cacdac, ang OFWs mismo ang nag-request para sa repatriation kag nakabaton man sang gilayon nga assistance kag reintegration support sang nag-abot na sa Manila sa bulig man sang Department of Foreign Affairs (DFA) kag Overseas Workers Welfare Administration (OWWA).
Magluwas sa repatriation suno sa tiglikom, lakip sa mga lihok sang gobyerno amo ang onsite monitoring kag ang pagpakig-istorya sa Filipino community ukon ang crisis management.
Sang weekend man sang nagpaguwa sang statement ang embahada sang Pilipinas sa amo nga pungsod kun sa diin ginahaylo ang mga Pinoy nga magbakwit na samtang nagalala pa ang tensyon sa tunga sang Israeli military kag paramilitary group nga Hezbollah nga suportado naman sang Iran.
Sa advisory sang embassy, ginsiling sang otoridad nga dapat maghingagaw-biya ang mga Pilipino samtang bukas pa ang mga paluparan.
Matandaan nga napasaka na sang embassy ang status sa Alert Level 3 kun sa diin ginatugutan ang voluntary evacuation.
Base sa rekord sang DFA, kabug-usan nga 365 ka mga indibidwal ang napabalik sa Pilipinas halin sang nagsugod ang tension.
Sa separado nga impormasyon halin kay Foreign Affairs Undersecretary Eduardo de Vega, ginsiling sini nga ginabanta 1,000 ka mga Pinoy ang nagahingyo sang repatriation halin sa Lebanon.
Sini lang nga Domingo (Manila Time), ginkumpirma sang Lebanese Health Ministry nga ang air strike sang Israel sa southern Lebanon ang nagpatay sa 10 ka Syrians kag gin-report man sang military sang Kyiv nga gin-igu sini ang weapons stores sang Hezbollah movement.
Magluwas sa kahangawa sa all-out war, naga-eksperyensya man subong ang mga pumuluyo sa amo nga pungsod sang total blackout bangud suno sa state electricity company, nahubsan na sang fuel reserve ang katapusan sini nga operational power plant. Pahayag sang kumpaniya, ini nga sitwasyon ang magaapekto pati sa importante nga mga pasilidad kaangay sang airport, pantalan, water pumps, sewage systems, kag mga presuhan.
Nag-abiso naman ang south Lebanon Water Corporation sa mga tawo nga magkinot gid sa tubig bangud apektado man sang blackout ang ila abilidad nga mag-pump sang tubig nga kinahanglanon sang mga pumuluyo.#
