Nakuha sang 28-anyos nga Pinoy pole vault star nga si Ernest John “EJ” Obiena sa 2024 Lausanne Diamond League sa Switzerland ang medalya nga ginhandum kag gindumtan sini nga mabulsa kuntani sa Paris Olympics.
Halos pareho nga pole vaulters ang nakasumpong ni Obiena sa amo nga kumpetisyon nga ginpatigayon masobra isa ka semana matapos nagtakop ang Summer Games.
Bronze medalist ang Pinoy pride kaupod kanday Sondre Guttormsen sang Norway kag Kurtis Marschall sang Australia matapos na-clear ang 5.82 meters sa una nga attempt apang wala na na-clear ang 5.92 sa tatlo ka attempts.
Ang Olympic bronze medalist nga si Emmanouil Karalis sang Greece ang nagpang-anum lamang nga may yara man sang clearance nga 5.82-meters apang mas manubo ang iya puwesto bangud nakalukso ini sa bar sa iya second attempt kag napaslawan sa 5.92 sa tatlo gid ka beses.
Wala naman sang nakibot sang nagpanguna sa tournament ang world number one kag reigning Olympic champion nga si Armand “Mondo” Duplantis sang Sweden samtang nagpangaduha naman ang Paris silver medalist nga si Sam Kendricks sang United States.
Matandaan nga sa Paris Games, pareho sanday Obiena kag Karalis nga may clearance nga 5.90 meters apang nagkadto sa Greek pole vault star ang medalya bangud sa tiebreaker.
Kasunod sang Olympiada, nakabalik pa si Obiena sa Manila apang pila ka adlaw gid lamang ang iya gindugay bangud nagbalik ini sa Italya para magsabak liwat sa training para sa palaabuton sini nga mga kumpetisyon.
