Gin-athag sang Department of Health Western Visayas nga wala ini sang pending tests kag ginahulat nga resulta kaangot sa mpox ukon ginatawag anay nga monkeypox.
Ini sa tunga sang liwat nga kahangawa sang publiko matapos nga nagsaka na sa lima ang kumpirmado nga bag-o nga kaso sa Pilipinas lakip na ang isa ka 12-anyos nga bata halin sa CALABARZON.
Sa interview sang Bombo Radyo kay Dr. Bea Camille Natalaray sang Infectious Disease Section sang DOH-6, iya ginpahayag nga ang ginahimo subong sang health department amo ang pag-engganyo sa clinics kag health units nga mag-report gilayon kun may suspected cases na sang amo nga balatian.
Padayon suno sa iya ang pahanumdom sang epidemiology and surveillance unit sang DOH-6 sa surveillance teams sa provincial kag municipal levels nga magpasa sang specimens sa regional office kun may pasyente nga makitaan sang sintomas.
Kun may mapasa nga specimens, ang DOH-6 amo ang magapa-facilitate sang pagpasaka sini sa Research Institute for Tropical Medicine sa Muntinlupa City para sa kumpirmasyon.
Ang mpox mahimo makalapta paagi sa close and intimate contact sa infected person ukon sapat amo man ang exposure sa contaminated materials kaangay sang pilas, body fluids, kag respiratory droplets.
May duha ka subtypes sang sini nga balatian: ang Clade 1 nga endemic na sa Basin sa central Africa; kag Clade 2 nga endemic sa West Africa.
Ang paglapta sang Clade 1b kag detection sang kaso sa iban nga mga pungsod amo ang nagtulod sa WHO nga ipaguwa na ang top emergency alarm bangud nakitaan man ini sang higher fatality rate ipaanggid sa Clade 2.
