Gintulod ni former presidential legal counsel Salvador Panelo si anay Presidente Rodrigo Duterte nga magpadalagan sa pagka-bise presidente sa 2028 agud nga mangin tandem sila sang iya anak nga si Sara.
Suno kay Panelo, isa lamang siya sa mga nagaduso para sa Duterte-Duterte tandem sa 2028.
Apang antes ang amo nga tuig, ginpanugyanan sini anay ang former president nga magpadalagan bilang mayor sa Davao City sa 2025, kag sa pag-abot sang presidential elections, updan na sini si Vice President Sara.
“Mr. President, ang advice ko sa iyo tumakbo ka munang mayor. Kailangan mo ang Davao… Tumakbo kang mayor, then sa 2028 tumakbo kang vice president ng anak mo,” suno kay Panelo sa isa ka press conference sa Quezon City.
“Pag Duterte-Duterte, sigurado ‘yan, babalik sa inyo lahat ng bumaliktad sa inyo kasi napakalakas ninyo,” dugang sini.
2022 sang nagtakop ang presidential term ni Duterte, kag ginsundan siya ni President Ferdinand Marcos Jr. nga running mate anay ni Sara Duterte sa idalom sang banner sang UniTeam.
Nabungkag na ang UniTeam subong, may word war sa tunga sang mga Duterte kag Marcos, kag nag-resign naman si Sara sa Gabinete sang Marcos administration.
Una na nga ginpahayag ni Sara nga magapadalagan ang iya amay kag mga utod sa pagka-senador, apang ginbaliskad ini sang amay nga Duterte kag nagsiling nga nagahalog lang ang iya anak.
Apisar matunog naman ang pangalan ni Sara nga magapadalagan sa pagka-presidente sa 2028, nagapamalibad ini sa paghatag kumpirmasyon bangud malayo pa suno sa iya ang piniliay.
