Napabalik na diri sa Pilipinas si dismissed Bamban, Tarlac Mayor Alice Guo ukon ang Chinese national nga si Guo Hua Ping matapos nadakpan sa Indonesia sang Miyerkules sang kaagahon.
Nag-abot sa private hangar sa Pasay City ang eroplano sakay si Guo kag iban nga government officials dies minutos makaligad sa ala una subong nga kaagahon, Septyembre 6.
Mismo sanday Interior Secretary Benjamin Abalos kag Police chief General Rommel Marbil ang naglupad pa-Jakarta agud maproseso ang deportation sa anay alcalde kag madala ini pauli sa Pilipinas agud atubangon ang sampaw-sampaw nga mga panumbungon batok sa iya.
Una na nga ginpahayag ni Philippine National Police (PNP) spokesperson Police Colonel Jean Fajardo nga ipaidalom anay si Guo sa medical check-up sa Camp Crame kag sunod nga itugyan sa Senado para sa implementasyon sang arrest warrant halin sa upper chamber.
As of press time, wala pa sang gin-grant nga interview ang former mayor apang base sa video nga ginbalhag nga amo ang ila una nga pagkit-anay ni Abalos sa Indonesia, nakasiling si Guo nga mapabulig siya sa tiglikom bangud may death threat siya nga nabaton.
Wala naubos-pabati ang sabat ni Abalos bangud gin-mute ang video nga gin-post sa iya Facebook account apang may parte nga nagsiling siya nga, “Kaya nga kami kumuha ng private plane…”
Hulyo 13 sang nag-isyu ang Senado sang arrest order batok kay Guo bangud pagpamalibad na sini nga magtambong sa imbestigasyon kaangot sa iligal nga Philippine Offshore Gaming Operator (POGO) hub sa Bamban.
Nagapangatubang siya sang kabug-usan nga 87 counts sang money laundering complaint magluwas pa sa tax evasion kag sa human trafficking complaints nga naangot man sa POGO hub.
Kahapon, nagpaguwa man ang Tarlac Regional Trial Court Branch 109 ang arrest warrant batok sa iya kaangot naman sa kaso nga graft. Two counts ini sang ginaalegar nga violation sang Anti-Graft and Corrupt Practices Act ukon Republic Act No. 3019, apang mahimo siya makapiyansa sang P90,000 kada count.
Una na naghingyo ang legal team ni Guo sa publiko nga indi anay paghabuyan sang malain nga mga akusasyon ang former mayor bangud nagapabilin siya nga inosente samtang wala pa napamatud-an sa korte ang tanan nga panumbungon batok sa iya.##
