ILOILO CITY – Patay ang isa ka lalaki matapos nakastiguhan sa baylehan sa Brgy. Iniligan, Badiangan, Iloilo.
Ang biktima amo si John Kaven Sagala, residente sang Brgy. Agusipan, Badiangan, Iloilo.
Ang mga suspek naman amo sanday Edcel Luceño, Eugene Luceño, Joross Paclibar, CJ Barrato kag Alyas John nga isa ka menor-de-edad.
Sa interview sang Bombo Radyo kay Police Captain Alexander Lauron, hepe sang Badiangan Municipal Police Station, iya ginpahayag nga ang kahiwatan ang kadungan sang selebrasyon sang Araw ng Kabataan.
Suno kay Lauron, nag-rambol ang mga grupo sang mga suspek kag grupo sang biktima.
Apang natam-an ang biktima matapos ginlasak sang mga suspek sa diin gingamitan pa ini sang ‘picha korno’.
Gindala pa ang biktima sa Janiuay District Hospital, apang ginpapauli man sang doctor.
Sa ulihi, ginbalik ini liwat sa nasambit nga ospital bangud sa pagpalanakit sang iya tiyan.
Diri na kag gindala ini sa Western Visayas Medical Center (WVMC), apang wala na matabangan pa.
Sa subong, ginapreparar na sang pulis ang kaso batok sa mga suspek nga possible magpangatubang sang kaso nga homicide.
