Ginbulgar sang International Criminal Police Organization (Interpol) nga may anum ka foreign “supporters” nga nagbulig kay dismissed Bamban, Tarlac Mayor Alice Guo kag nagtago sa iya sa balay sang isa ka monghe antes siya naaresto sa Indonesia subong nga semana.
Suno kay Inspector General Krisha Murti, head sang Interpol sa Indonesia, may babaye nga monghe nga nagtanyag kay Guo nga magtinir sa isa ka balay sa Tangerang City.
Suno kay Murti, lakip sa nagbulig kay Guo amo ang lima ka Chinese kag isa ka Indonesian nga amo ang nag-manehar para sa iya kinahanglanon lakip na ang transaksyon online, pagpa-arkila sang salakyan, kag pagbayad sa hotel.
“Some supporters…know nothing about Alice Guo, said they only support her, like renting a car, paying the hotel… They transfer money from [another] country,” suno kay Murti.
Ginpahayag man sini nga sa idalom sang sini nga “business” transaction, nagbayad ang anay mayor nga amo man ang Chinese national nga si Guo Hua Ping.
Gindugang sini nga nakasulod si Guo sa Indonesia halin sa Singapore nga legal nga wala sang red notice — buot silingon, daw isa lang ini ka ordinaryo nga tawo nga nagabyahe.
“So she was like an ordinary person from overseas country coming to Indonesia,” pahayag sang Interpol official.
Nadakpan siya suno kay Murti bangud sa impormasyon halin sa mga opisyal sa Pilipinas matapos una naman nadakpan ang iya utod nga si Sheila kag ang kaupod nga si Cassandra Li Ong sa Bamban sang Agusto.
Ginklaro man sang Indonesian official nga wala sang deal nga ibaylo si Guo sa Australian kag high profile drug trafficker nga si Gregor Johann Haas nga nadakpan sa Pilipinas sang Mayo kag wanted sa Jakarta bangud sa kaso nga drug trafficking.
Nahibaluan nga magluwas sa kaso nga graft, may iban pa nga reklamo nga ginaatubang si Guo lakip ang qualified human trafficking, tax evasion, kag money laundering bangud sa iya ginaalegar nga kaangtanan sa iligal nga mga aktibidad sang Phililippine Offshore Gaming Operator (POGO) hub sa Bamban.
1:10 kahapon sang kaagahon, Septyembre 6, sang ginbalik si Guo sa Pilipinas matapos nadakpan sa Tangerang City, Indonesia.##
