ILOILO CITY – Nagbubu ang nagkalain-lain nga suporta sa mga bar takers kadungan ang una nga adlaw sang Bar examinations subong nga Dominggo, Setyembre 8.
Sa interview sang Bombo Radyo kay Matt Java, Law Student kag Head sang Central Philippine University (CPU) Bar Operations, iya ginpahayag nga antes pa man ang adlaw sang pasinawan, nagbulig na sila sa mga bar takers.
Suno kay Java, boluntaryo sila nga nagbulig sa mga bar takers halin sa ila unibersidad agud indi na ang mga ini mabudlayan sa pag-review kag pagkuha sang pasinawan.
Subong nga una nga adlaw sang bar examinations, ginpasigurado nanday Java kaupod sang mga kaangay niya nga volunteers nga may bastante nga pagkaon tubig kag iban pa nga mga kinahanglanon ang mga bar takers.
Magalawig naman ang ila Bar Operations tubtob sa masunod nga mga examinations sa Septyembre 11 kag 15.
Nahibaluan nga 13 ka mga testing centers sa bilog nga pungsod, isa ang Central Philippine University sa Jaro, Iloilo City sa mga napilian nga hiwatan sang pasinawan.
Ginpatuman naman ang hugot nga seguridad sa palibot sang unibersidad sa diin sirado sa trapiko ang mga dalan sa atubang sang unibersidad kaangay sang Lopez Jaena, Cabangbang, kag Miramar Subdivision umpisa las 2:00 sa kaagahon tubtub alas 9:00 sa aga kag halin las 3:00 sa hapon tubtub alas 8:00 sa gab-i.
