Gin-anunsyo sang cardiologist, health advocate, kag 2022 vice presidential candidate nga si Dr. Willie Ong nga nagapaidalom siya subong sa treatment matapos na-diagnose nga may cancer.
Sa isa ka video nga ginpaguwa sa iya social media platforms subong nga weekend, nakit-an nga daku gid ang gin-niwang ni Ong nga mas kilala sang iya followers bilang si “Doc Willie.”
Pahayag sini, nakit-an sang mga doktor ang 16 x 13 x 12 centimeter nga sarcoma sa iya abdomen kag nakatago ini sa likod sang iya korason kag sa atubang sang iya spine.
Base sa Mayo Clinic, ang “sarcoma” amo ang general term sa “broad group of cancers” nga naga-umpisa sa tul-an kag soft ukon connective tissues.
“Ang bukol na ito, malaking malaki daw. Isa sa pinakamalaki na nakita nila,” pahayag sini.
Gin-istorya man sini nga Abril 2023 pa sang una sini nga nabatyagan ang sintomas sang iya balatian.
“Napansin ko noong April 2023 medyo hirap na ko mag medical mission. Kapag mainit, hindi ko na kaya. Ayoko na ng mainit,” kabahin sang 24-minute video.
Una nga nagpalanakit ang iya likod kag nabudlayan siya nga magtulog. Sa inisyal nga resulta sang blood tests, wala sang seryoso nga balatian ang doktor, apang naglapta pa ang sakit sa iya likod kag nagsaka-saka ini sa mas naibabaw nga bahin sang lawas.
“Worst pain of my life. 10 out of 10. Iiyak ka. Buong gabi walang tulog,” panaysayon sini.
Isa ka bulan ang nagligad, ginkumpirma na ang cancer diagnosis.
Ang video message ni Ong ang na-rekord sa iya hospital room sang nagligad pa nga Agusto 29 apang naatrasar ang pagpaguwa bangud sang seryoso kag kumplikado nga proseso sa chemotherapy.
Apisar sang pagpanghangkat sa kondisyon sang lawas, positibo ang panan-awan ni Ong bangud sa mga tawo nga nagapalangga sa iya.
“Malungkot ako? Hindi. Suwerte nga ako may asawa ako nagbabantay. Suwerte ako may [mga] anak ako… binabantayan ako. I’m so blessed,” pahayag sini. “Is this negative or positive? Negative, may bukol. Pero positive, naging close sa akin ‘yung dalawang anak ko, na dati may barrier kami. Pamilya ko naging close.”
Nahibaluan nga sa pag-advocate ni Ong para sa ikaayong lawas, lab-ot sa 9.7 million ang iya YouTube subscribers kag 17 million naman ang Facebook followers (as of posting time).
Nangin consultant man siya sang Department of Health sang 2010-2014 kag nangin runningmate anay ni former Manila Mayor Isko Moreno sang nagpadalagan sang 2022.#
