Napasakaan na sang kaso ang suspek sa ginaalegar ikaduha nga assassination attempt batok kay anay United States President Donald Trump.
Ginkilala ang suspek kay Ryan Routh, 58, tumandok sang North Carolina apang naka-istar sang damlag lang sa Hawaii.
Dies minutos ang ginlawig sang court appearance kun sa diin nakit-an pa ini nga nagayuhom-yuhom kag nagakadlaw.
Duha ka kaso ang ginpasaka nga amo ang “possession of a firearm by a convicted felon” kag “possession of a firearm with an obstructed serial number.”
Posible pa madugangan ini nga mga kaso. Sa masunod nga Lunes gin-set ang isa pa ka hearing.
Matandaan nga nagahampang si Trump sang golf sa iya club sa West Palm Beach sa Florida sang alas dos sang hapon sang Domingo (oras sa state) sang may nakit-an ang Secret Service agent nga may rifle barrel sa kahilamunan kag nakatutok sa former president.
Nagpalupok ang agent sa direksyon sang lalaki kag ginaalegar nga gilayon ini nga nagpalagyo apang nadakpan man sang mga agent sa major highway halos isa ka oras ang nakaligad. Nakit-an sang FBI sa lugar nga gintiniran sang suspek ang isa ka rifle, scope, duha ka backpacks, kag isa ka GoPro camera.
Base sa court documents, 12 ka oras pa ini nga nagpanago sa amo nga lugar antes na-detect sang Secret Agent.
Sa record sa korte, nakit-an man nga may masobra na 100 ka criminal counts nga na-file anay batok sa suspek sa North Carolina.
Bangud sang natabo, mas nagatunog subong ang panawagan nga hatagan sang dugang nga proteksyon ang presidential candidates sa Estados Unidos sang Amerika.
Ginpahayag naman ni US President Joe Biden nga posible nga nagakinahanglan sang dugang nga bulig ukon extra nga personnel ang Secret Service.
