Gin-delete na ni U.S. President Donald Trump ang kontrobersyal nga A.I.-generated image nga iya gin-post sa Truth Social nga daw si Hesukristo ang iya itsura samtang nagabulong sa isa ka tawo.
Gin-ulan sang pagpakamalaot ang amo nga picture nga iya gin-post matapos ang malawig man nga atake sini kay Pope Leo XIV nga isa naman ka vocal critic sang gyera batok sa Iran.
Sa pag-atubang ni Trump sa reporters, gin-ako sini nga siya mismo ang nag-post sang laragway.
Makit-an nga nakasuksok si Trump sang white robe kag nagasanag ang iya kamot nga naga-uyat sa agtang sang isa ka pasyente.
Sa background, makit-an ang Statue of Liberty, ang daku nga US flag, may fighter jets, may agila, kag may yara man sang nurse, babaye nga nagapangamuyo, kag isa ka soldado.
Suno kay Trump, para sa iya, ang amo nga picture nagapakita nga isa siya ka doktor nga nagatindog kaupod sa Red Cross worker.
“Well, it wasn’t a picture, it was me,” suno kay Trump. “I did post it, and I thought it was me as the doctor, and it had to do with the Red Cross as a Red Cross worker there, which we support.”
Lakip sa nagsaway sa ginhimo ni Trump amo si former Italian prime minister Matteo Renzi nga nagtawag sa A.I. image nga “crazy” kag “blasphemous” para sa iya bilang isa ka Katoliko.
Sa separado naman nga sabat sa mga pahayag ni Trump batok sa iya, nagsiling si Pope Leo nga wala siya nahadlok sa Trump administration, apang indi man siya makig-debate sa president.
“I have no fear of the Trump administration,” suno sa Santo Papa.
“We are not politicians,” dugang sini. “We don’t deal with foreign policy with the same perspective he might understand it, but I do believe in the message of the gospel, as a peacemaker… I don’t want to get into a debate with him… I don’t think that the message of the Gospel is meant to be abused in the way that some people are doing”.#
