ILOILO – Nagdangat na sa 23 ang napatay bangud sa Dengue sa Iloilo Province.
Sa interview sang Bombo Radyo kay Dr. Ma. Socorro Quiñon, Head sang Provincial Health Office, iya ginpahayag nga ang pinakauna nga napatay bangud sa Dengue ang narekord sang Pebrero 11 sa diin naga-edad ini sang anom ka tuig nga lalaki halin sa Miagao, Iloilo.
Ang pinakaulihi naman nga nagdugang sa listahan amo ang 74 anyos nga babaye halin sa Concepcion, Iloilo.
Ini ang napatay sa Setyembre 9.
Suno kay Quiñon, humalin sang Enero 1 tubtob Setyembre 14, nagdangat na sa 8,752 ang dengue cases.
Ini ang mas mataas naman sang 622% kun ipaanggid sang 2023 nga may yara lang sang 1, 216 cases sa kaangay man nga period.
Sa pihak sini, ginpahayag sang natungdan nga nagnubo ang clustering of cases sa mga banwa sa morbidity week 37 nga may 38 kun ipaanggid sa morbidity week nga 36 nga may 41.
Sa barangays naman, may yara na lang sang 243 nga clustering of cases sa morbidity week 37 nga mas manubo kun ipaanggid sa morbidity week nga 36 nga may yara sang 351.
