Ginatinguhaan sang Iloilo City Government nga makay-o subong nga semana ang naguba nga elevator sa Iloilo Terminal Public Market.
Ini matapos nagpabutyag ang mga vendors kag manugbakal sa nasambit nga mercado nga nabudlayan sila sa ila pagpaninda bangud kinahanglan nila nga magsaka kag magpanaog paagi sa paggamit sang hagdanan.
Suno kay Local Economic Enterprise Office (LEEO) head Maricel Mabaquiao, naguba ang control board sang delivery elevator amo nga indi ini magamit.
Nahibaluan nga last week pa sang Agosto naguba ang nasambit nga elevator, samtang ang stainless elevator naman ang indi pa magamit bangud wala pa ini na-turn over sang contractor sa Iloilo City Government.
Pahayag ni Mabaquiao nga yara na sa procurement process ang pagbakal sang bag-o nga control board ukon Car Operating Panel (COP) para sa elevator.
Naghingyo man ini sa mga bolantero kag vendors nga temporaryo anay nga gamiton ang ramp kag indi pagdamuon ang produkto nga ipasaka ukon ipanaog samtang wala pa naga-operate ang elevator.
Ginpahayag pa ni Mabaquiao, may tion nga overloaded ang elevator rason nga madasig ini nga maguba.
Dugang pa niya, may yara sang operator ang duwa ka elevator sa nasambit nga merkado.
