MOLO, ILOILO CITY – Nagdangat sa P1.3 million nga balor sang illegal nga droga ang nakuha mga construction workers sa drug buy bust operation sa Barangay North Baluarte, Molo, Iloilo City.
Ang subject sang operasyon amo sanday alyas Greg, 28 nga isa ka foreman, residente sang Barangay Rizal Pala-Pala 1, Iloilo City Proper; kag alyas John-John, 31, residente sang Bacolod City.
Magluwas diri, naaresto man ang apat pa gid ka mga construction workers nga mabakal kuntani sang iligal nga droga.
Sa interview sang Bombo Radyo kay Police Captain Ryan Christ Inot, team leader sang City Drug Enforcement Unit (CDEU), iya ginpahayag nga ang foreman gid ang nagabaligya sang illegal nga droga.
Suno kay Inot, gin-ako sang foreman nga nagahalin sa Bacolod City ang illegal nga droga nga iya nabaligya kag ginapaagi ini sa Roll-on/Roll-off (RORO) ships.
Nakuha naman sa posisyon sang mga arestado ang 195 grams sang suspected shabu kag iban pa nga drug paraphernalia.
Sa subong, preso na ang mga ini sa Iloilo City Police Station 1 kag nagapangatubang sang kaso nga paglapas sa Republic Act No. 9165 ukon Comprehensive Dangerous Drugs Act of 2002.
