Bisan sa damgo, indi gid naton gusto ang eksperyensya nga ginakagat kita sang sapat kaangay abi sang man-og. Pat-od nga nagakurog-kurog ka gid sa imo pagbugtaw!
Apang may isa ka babaye nga naka-eksperyensya sini sa Phra Samut Chedi district, Thailand.
Natabo ini sang nagligad gid lamang nga gab-i sa balay sang biktima nga si Arrom Arunroj, nagaedad sang 64-anyos.
Naga-isahanon siya sa puluy-an, nagpanyapon sang 8:30 sang amo nga gab-i, kag nagpanghugas sang pinggan sa guwa sang ila balay sang gulpi lang may nagkagat sa iya tiil.
Ini amo ang apat ka metros nga python nga nagabug-at sang ginabanta 20 -kilos.
Sunod siya sini nga ginburambudan kag apisar sang iya pagwaras, indi siya makasarang sa kakusog sang sapat.
Nagsinggit ang tigulang apang alas dies na kag nabatian sang kasilingan ang iya pagpangayo sang tabang kag nakapangayo sang bulig sa otoridad. 30 minutos pa gid ang ginlawig antes nakakas sang rescuers ang man-og.
May mga pilas na ang tigulang sa duha ka oras nga engkwentro sini batok sa sapat kag nagpalangluya na ini sa kakapoy gani gindala ini sa ospital.
Nahibaluan nga indi man venomous ang pythons apang ang ila kagat ang mahimo makatuga sang infection.
Sa subong, padayon pa sa pag-recover ang biktima sa ospital.
