Bisan ano pa ang imo nga rason, sala gid ang pagpangawat. Piso man ukon minilyon, basta indi imo kag ginkuha mo, pagpangawat man gihapon ang tawag dira.
Sang damlag lang, may isa ka tawo nga nagtandog sang balatyagon sang kadam-an bangud sa iya ginpakita nga paghinulsol sa iya pagpangawat halos tatlo ka dekada na ang nagligad.
Sang natabo ang Asian financial crisis sang 1997, may isa ka bata nga nagsaka sa bukid kag nagtaklas sa isa ka templo sa Gyeongsang, South Korea agud nga kuhaon ang ginabanta P1,200 nga donasyon.
Matapos sadto, nagbalik pa gid siya sa templo agud mangawat liwat, apang nadakpan siya sang monghe, kag ginpunggan ang iya tuyo.
Sa baylo nga magpangakig, nagpiyong lang ang monghe nga daw kaangay nga nagpangamuyo.
Natandog gid ang balatyagon sang bata bangud sa ginhimo sang monghe kag nagpromisa siya nga indi na maghilabot sa mga bagay nga wala niya ginapanag-iyan.
Subong nga 2024, matapos ang 27 ka tuig, nagbalik ang lalaki sa templo, gin-uli niya ang iya ginkawat nga P1,200 kag naghatag pa sang donasyon nga masobra P80,000.
May ginbilin man ini nga sulat sa donation box sang Tongdo Temple sa Jajangam Hermitage kun sa diin ginsugid sini ang istorya, kag nag-sorry man bangud sa iya nahimo sang bata pa.
Dugang sini, manugbata na ang iya asawa kag nagalaum siya nga mangin isa siya ka matarong nga amay paagi sa sini nga bagay.
“I’m sorry I didn’t come back earlier. I hope you can think of it as a temporary loan. I’m expecting a baby soon, and I want to be a proud and honorable father to my child. Thank you so much, monk. I’m sorry again,” kabahin sang apology letter.
Ang gintumod sini nga monghe nga nakadakop sa iya ang nagatinir pa gihapon sa templo kag isa sa pinakanalipay bangud sa iya ginhimo nga pag-uli sang kuwarta.#
