Ginkumpirma sang Israel nga napatay nila ang top commander sang militante nga grupo nga Hezbollah sang nagpatigayon sila sang airstike sa Lebanon subong nga semana.
Ginkilala ang napatay kay Aqil nga naka-serbe sa mataas nga military body sang grupo kag amo man ang acting commander sang elite force nga Radwan.
Suno sa militar, nalakip siya sa iban pa nga senior commanders sang unit nga ginbawian sang kabuhi bangud sa atake sang Israel samtang nagahiwat sila sang meeting.
Sa amo nga strike, siyam ka tawo kag 59 ang pilason suno sa inisyal nga isip sang Lebanese health ministry.
Ini nga strike ang kasunod sa sunod-sunod nga pagsigabong sang pagers kag walkie-talkies ukon hand-held radios nga ginagamit sang Hezbollah subong man nga semana. 37 ang kabug-usan nga patay sa amo nga explosions kag linibo ang napilasan.
Ginabasol sang Hezbollah nga ang Israel ang may kahimuan sa atake, apang wala sang kumpirmasyon kag wala man sang pagpanginwala nga ginhimo ang pihak nga kampo.
Ini na ang ikaduha nga tion sa sulod sang wala pa gani duha ka bulan nga gin-target sang Israel ang nagapanguna nga military commander sang Hezbollah sa Beirut. Sang Hulyo, may ginpatigayon man nga Israeli airstrike nga nagpatay kay Fuad Shukr nga amo ang top military commander sang grupo.
Sa bahin sang Department of Foreign Affairs (DFA), ginkumpirma sini nga wala sang mga Pilipino nga nalakip sa mga napatay ukon napilasan sa sunod-sunod nga ginamo sa amo nga pungsod sa Middle East.
Una naman nga nagpaguwa sang abiso ang Philippine Embassy nga dapat ikonsiderar na sang mga Pinoy ang pagbiya sa Lebanon samtang available pa ang commercial flights.
Nahibaluan nga subong nga tuig, sunod-sunod ang pag-repatriate sang gobyerno sa mga Pilipino halin sa amo nga nasyon bangud sa kahangawa sa pagsangkad sang gyera sang Israel kag Palestine nga posible nga intrahan pa gid sang Iran kag Estados Unidos sang Amerika.#
