Nanindugan si Senator Ronald ‘Bato’ Dela Rosa nga kabahin lamang sang “demolition job” ang mga pahayag ni anay Iloilo City Mayor Jed Patrick Mabilog sa atubang sang quad committee ukon quad comm.
Ang ginatumod sini amo ang una nga pagtambong ni Mabilog sa quad comm hearing sang Huwebes, Septyembre 19, kun sa diin ginsapubliko sini nga nakabaton siya sang impormasyon nga pwersahon siya nga itudlo sanday anay senador Franklin Drilon kag Mar Roxas bilang mga drug lord.
Nagdugang man si Mabilog nga nakabaton siya sang mga pamahog sa ila kabuhi matapos nga gin-tag siya ni anay President Rodrigo Duterte bilang protector sang mga nagaduso sang iligal nga droga.
Nalakip man sa iya statement amo nga nagtawag si Bato nga amo anay ang chief sang Philippine National Police (PNP) kun sa diin ginpakadto siya sini sa Camp Crame, apang wala siya nagdayon bangud may isa pa gid ka tawag nga nag-abot nga nagpaandam sa iya nga indi magkadto.
Suno naman kay Bato, isa ka “fishing expedition” ang ginahimo nga imbestigasyon sa Kamara kun sa diin ginapangitaan sang sala si Duterte kag iya mga kaalyado.
Ginsiling man sini nga gingamit si Mabilog para nga maguba ang pangalan ni Sara Duterte nga matunog nga ginabati-bati nga magapadalagan sa pagka-presidente sa 2028.
“Demolition job [itp] para masira kaming lahat at hihina si VP Sara [Duterte] sa 2028… Fishing expedition, paghahanap ng mga kasalanan ni Duterte at kanyang mga associates,” suno kay Dela Rosa nga kaalyado man sang mga Duterte.
Ginpahayag man ni Bato nga wala siya sang impormasyon nga involved sa iligal nga droga sanday Roxas kag Drilon. Gindugang man sini nga wala man nagmandu sa iya si Duterte nga ibutang sa drug list ang bisan sin-o ukon bisan ang iya nga mga kaaway sa pulitika.
“Wala akong info. At wala tayong basis na ipapaturo siya at saka hindi naman ugali natin ipapaturo bakit naman ganun? Ipapaturo ko ‘yung mga tao na matitino?” dugang sang former PNP chief.
Ginhangkat man sini si Mabilog nga hingadlan kun sin-o nga heneral ang nagsugid sa iya sang ginaalegar plano nga itum-ok sanday Roxas kag Drilon bilang mga drug lord.
Samtang, sa bahin sang PNP, ginsiling sang spokesperson nga si Police Colonel Jean Fajardo nga makig-angot sila sa kampo sang anay alkalde agud nga i-check ang iya mga alegasyon. Nagpanindugan si Fajardo nga nagapabilin nga apolitical kag patas ang mga pulis sa ila imbestigasyon.#
