Patay ang apat ka tawo kag nasamaran ang 17 ka iban pa sa panibag-o nga mass shooting incident sa Estados Unidos sang Amerika.
Natabo ini sa Five Points South area sa Alabama nga isa ka popular nga lugar bangud sa restaurants, night clubs, pubs kag live music venues nga malapit man sa University of Alabama sa Birmingham campus kag downtown.
Base sa Birmingham police, pasado alas onse sa gab-i sang nag-abot ang mga suspek sa Five Points South, nagguwa sa salakyan, nagpalupok, nagbalik sa salakyan, kag nagpalagyo.
Ginapatihan nga isa sa mga napatay ang target sang mga suspek ukon isa ka murder-for-hire kag nadalahig lamang ang iban nga yara sa lugar.
Tatlo sa mga biktima ang dead on the spot, samtang isa naman ang nakalab-ot pa sa University of Alabama Hospital apang gindeklarar man nga ginbawian sang kabuhi.
Wala sang suspek nga napaidalom subong sa kustodiya sang otoridad apang nagapakig-angot na ang Birmingham Police Department sa FBI kag iban pa nga kaangot nga ahensya.
Ini nga incidente ang kabahin sang masobra 400 na ka mass shootings sa United States subong nga tuig base sa record sang Gun Violence Archive.#
