Nagsaka na sa 274 ang patay kag 1,024 ang nasamaran sa airstrikes sang Israel sa Lebanon sa sulod lamang sang isa ka adlaw.
Natabo ini subong nga Lunes kun sa diin ginkumpirma sang Israel nga 300 ka “terrorist targets” ang ila gin-igu sa sulod sang kaiping nga pungsod nga ginapatihan naangot sa Hezbollah nga amo ang militant group kag political party nga suportado sang Iran nga regular nga kasumpong sang Israel halin sang natabo ang Gaza war sang Oktubre 2023.
Ini nga death toll amo ang pinakamataas nga numero sa away sang Hezbollah kag Israel subong nga tuig kag amo man ang pinakamakamamatay nga adlaw halin sang natabo ang masobra isa ka bulan nga giyera sa tunga sang Israel kag Lebanon sang 2006.
Suno sa Israel Defense Forces, mas pasangkaron pa nila ang ila atake sa “terror targets” sa Bekaa Valley sa eastern border sang pungsod.
Nagpaandam man ini sa mga sibilyan nga magbakwit na kag magpalayo sa mga lugar nga naka-posisyon ang militante nga grupo.
“To those who didn’t understand, I would like to clarify Israel’s policy: we’re not waiting for a threat, we are ahead of it. Everywhere, in every arena, anytime. We’re eliminating seniors, eliminating commanders, eliminating rockets – and counting. Those who will try to hurt us, we will hurt him gravely,” suno kay Prime Minister Benjamin Netanyahu.
Gin-abisuhan naman sang health ministry ang mga ospital sa nabagatnan kag nasidlangan nga i-suspinde anay ang indi pa tuman ka kinahanglanon nga surgeries kag magtutok anay sa mga napilasan sa airstrikes.
Ginsirado naman sang Ministry of Education ang tanan nga high schools, vocational kag technical colleges, kag ginsuspinde ang klase sa Lebanese University sa Beirut.
Ginkumpirma naman sang Israel Defense Forces nga ini ang una nga bes nga nagpaandam sila nga magpalayo ang mga sibilyan sa Lebanon sa militant positions. Ila man ginpahayag nga nagatutok sila subong sa aerial strikes kag wala pa sang ginapatigayon nga ground assault.
Una na nagpaandam ang United Nations sa posible mga risgo pananglitan himuon sang Israel ang Lebanon nga daw kaangay sa Gaza nga subong halos napulbos na bangud sa gyera kontra sa Hamas.
Pananglitan madayon ang all-out war sa Lebanon, magasangkad pa ang ginamo sa Middle East kag ginakahangaw-an ang pag-intra sang Iran nga taga-suporta sang Hezbollah kag Estados Unidos sang Amerika nga kaalyado naman sang Israel.#
(Photo: Aziz Taher / Reuters)
