Nagsaka na sa 492 ang patay kag 1,645 ang nasamaran sa airstrikes sang Israel sa Lebanon sa sulod lamang sang isa ka adlaw.
Natabo ini kahapon, Lunes, kun sa diin ginkumpirma sang Israel nga 300 ka “terrorist targets” ang ila gin-igu sa sulod sang kaiping nga pungsod nga ginapatihan naangot sa Hezbollah nga amo ang militant group kag political party nga suportado sang Iran.
Ini nga death toll amo ang pinakamataas nga numero sa away sang Hezbollah kag Israel subong nga tuig kag amo man ang pinakamakamamatay nga adlaw halin sang natabo ang masobra isa ka bulan nga giyera sa tunga sang Israel kag Lebanon sang 2006.
Suno sa Israel Defense Forces, mas pasangkaron pa nila ang ila atake sa “terror targets” sa Bekaa Valley sa eastern border sang pungsod.
Nagpaandam man ini sa mga sibilyan nga magbakwit na kag magpalayo sa mga lugar nga naka-posisyon ang militante nga grupo.
Suno naman kay Prime Minister Benjamin Netanyahu, indi mga taga-Lebanon ang ila kontra, apang kinahanglan nila nga papason ang mga armas kag ginahukmungan sang Hezbollah antes pa man ini makalupad sang mga rocket agud nga iguon man ang mga residente sang Israel.
Gin-abisuhan naman sang health ministry ang mga ospital sa nabagatnan kag nasidlangan nga i-suspinde anay ang indi pa tuman ka kinahanglanon nga surgeries kag magtutok anay sa mga napilasan sa airstrikes.
Ginsirado naman sang Ministry of Education ang tanan nga high schools, vocational kag technical colleges, kag ginsuspinde ang klase sa Lebanese University sa Beirut.
Ginkumpirma naman sang Israel Defense Forces nga ini ang una nga bes nga nagpaandam sila nga magpalayo ang mga sibilyan sa Lebanon sa militant positions. Ila man ginpahayag nga nagatutok sila subong sa aerial strikes kag wala pa sang ginapatigayon nga ground assault.
Una na nagpaandam ang United Nations sa posible mga risgo pananglitan himuon sang Israel ang Lebanon nga daw kaangay sa Gaza nga subong halos napulbos na bangud sa gyera kontra sa Hamas.
Pananglitan madayon ang all-out war sa Lebanon, magasangkad pa ang ginamo sa Middle East kag ginakahangaw-an ang pag-intra sang Iran nga taga-suporta sang Hezbollah kag Estados Unidos sang Amerika nga kaalyado naman sang Israel.
MGA PILIPINO SA LEBANON
Samtang, liwat nga nag-abiso ang embahada sang Pilipinas nga dapat nga magpabilin nga vigilante ang mga Pilipino ilabi na ang nahamtang sa south Lebanon.
Wala pa sang kumpirmasyon kun may mga Pilipino nga nalakip sa nasamaran kag napatay sa airstrikes, apang base sa pahayag sang embassy, dapat nga magpabilin sa sulod sang balay ang Filipino nationals kag pasulabihon gid ang safety and security samtang wala pa nagatahaw ang bombahanay.
Antes ang airstrikes kahapon, ginpahayag ni Philippine Ambassador to Lebanon Raymond Balatbat nga ginatos ka mga Pilipino ang nagbawi sang ila nga request nga magpa-repatriate apisar sang gamo sa amo nga pungsod.
Yara sa 1,174 ang applications for repatriation apang halin sang nagluntad ang kinagamo, 505 pa lamang ang napapauli sa Pilipinas bangud nagdesisyon ang iban nga magtinir.
Una na nagsiling ang embahada nga dapat magbiya na ang mga Pilipino samtang may available pa nga commercial flights.
Ang Philippine government ang magasabat sa travel expenses bangud napaidalom ang Beirut sa alert level 3, buot silingon, available ang repatriation apang wala ginapilit ukon boluntaryo gid lamang.
