Luyag ni Iloilo 5th District Board Member Carol-V Espinosa-Diaz nga may yara sang food bank ang probinsya ilabi na sa quinto distrito agud masolusyonan ang over supply sang mga isda.
Ini kasunod sang pagdagsa sang madamo nga tuloy sa Concepcion, Iloilo sang damlag lang.
Sa interview sang Bombo Radyo kay Board Member Diaz, iya ginpahayag nga nagapakita nga healthy ang kadagatan sa nasambit nga banwa apang kun indi ini madumala sang maayo, mahimo nga mauyang na lang ang ginhatag nga bugay kaangay sang natabo sa Concepcion.
Kun sadto anay pahayag niya, ang isa ka banyera sang tuloy mabakal pa sa P200 apang sang nag-over supply ini, ginbaligya lang sang mga manugpangisda sa P20 tubtob P50 ang kada banyera.
Sa sobra nga kadamuon sang isda suno sa iya, indi na makaon sang iban nga tawo kag ginahaboy na lang.
Bangud nga indi man maubos ang isda sa pagbaligya, ang iban sini ang ara na lang sa shoreline nga nagakapatay kag nagabaho sa diin nagaresulta sang pagdamo sang langaw.
Ginakabig sang natungdan nga indi ini hygienic kag maka-contribute pa ini sa pollution.
Amo ini ang rason suno kay Board Member Diaz nga magapatigayon sang committee hearing ang Sangguniang Panlalawigan agud makapangita sang solusyon kun paano magamit kag mabutang sa insakto ang mga nagasobra nga pagkaon.
Kun may food bank pahayag sang board member, diri mabutang ang mga nagasobra nga pagkaon agud mahatag sa mga pumuluyo nga ginakulang.
Nahibaluan nga sa ginhiwat nga regular session, nag-deliver sang privilege speech si Board Member Diaz nga may tig-ulo “Zona of Fish.”
