Ginapreparahan sang militar sang Israel ang posible pagpatigayon sang ground assault ukon ground operation sa Lebanon.
Kasunod ini sang ila asud-asud nga air strikes nga ginlunsar batok sa Lebanese armed group Hezbollah.
Antes sini, ginpahayag man ang Israeli Army nga ginpatawag sini ang duha ka brigades sang reservists sa north agud padayunon ang pagpakig-away batok sa militante nga grupo nga Hezbollah.
Gin-anunsyo man sang Lebanese health minister nga sang Miyerkules, may panibag-o nga 61 nga napatay sa strikes.
Nagsaka na sa 615 ang patay sa nagligad nga tatlo ka adlaw nga atake kun sa diin masobra naman sa 2,000 ang nasamaran.
Sa pihak nga bahin, ginapangunahan naman sang Estados Unidos ang madamo nga pungsod sa pagpanawagan nga ipatigayon anay ang ceasefire sa Lebanon.
Suno kay White House press secretary, Karine Jean-Pierre, padayon nila nga ginalab-ot ang Israel para sa kasugtanan, apisar nga una na nagpangindi ang Israel sa ceasefire kag determinado gid nga papason ang Hezbollah.
Nagapadayon naman subong ang istoryahanay sa United Nations General Assembly sa New York kun sa diin nalakip ini sa istorya.
