Gin-utihan gid ang proseso sa assessment sa kaso sang walo ka bulan nga lapsag nga nakit-an sa sulod sang isa ka comfort room sa mall sa Mandurriao, Iloilo City.
Subong nga Septyembre natabo ang insidente kag natigayon naman nga na-identify sang otoridad ang iloy nga taga-probinsya kag ang amay sang bata nga taga-distrito sang Molo.
Sa interview sang Bombo Radyo kay Merlyn Gison, assistant City Social Welfare and Development Office (CSWDO) officer, iya ginpahayag nga nagpungko ang multi-disciplinary team para sa amo nga kaso.
Ginalakipan ini sang social worker sa center nga amo ang present custodian sang baby; ang district social worker kun sa diin nagapuyo ang amay sang bata diri sa Iloilo City; ang counterpart sa probinsya kun sa diin naman nagapuyo ang iloy; ang Philippine National Police; ang Department of Social Welfare and Development Office – Crisis Intervention Unit kag Regional Adoption Council.
Una na nga ginpahayag sang opisina nga indi basta-basta itugyan liwat sa ginikanan ang bata bangud kinahanglan anay nga tapuson ang proseso kag assessment nga ginahimo para masiguro nga safe ini kag indi na masulit ang pagbilin sa iya.
Una na nagdepensa ang amay nga bulagay na sila sang iya partner kag ginasustentuhan man sini ang bata, apang wala gid siya sang hinalung-ong nga masarangan sang babaye nga ibilin lang ang ila lapsag sa sulod sang mall.
