ILOILO – Subong na nga adlaw, Setyembre 29 ang umpisa sang Season 2 sang Ilonggo Professionals Football League.
Sa interview sang Bombo Radyo kay Atty. Doni Almio, Board Member sang nasambit nga liga, iya ginpahayag nga antes pa man ang pandemya, nag-umpisa na sila sa paghampang kada Dominggo.
Suno kay Almio, sang natapos na ang pandemya, mas nagdamo pa gid ang mga nag-upod sa ila sa paghampang sang football.
Ini man ang nagtulod sa ila nga magpatigayon sang liga sa diin ang Season 1 ang ginpatigayon anom ka bulan na ang nagligad nga ginabug-usan sang 6 ka mga teams.
Subong nga season, may 12 na ka mga teams kag ginabug-usan sang maximum sa 30 ka mga myembro.
Ginalakipan ini sang mga doctor, abogado, architects, politiko kag iban pa nga professionals.
Maga-umpisa ang hampang kada las 3:00 sang hapon tubtob las 6:00 sang gab-i kada Dominggo sa diin patigayunon ini sa Paulino Alcantara Football Field sa Hacienda Verde, Brgy. Ungka II, Pavia, Iloilo.
Sa katapusan sang hampang, ang magadaog nga team ang magadala pauli sang trophy kag iban pa nga papremyo.
