Ginklaro sang Philippine Embassy sa Tel Aviv nga wala sang Pilipino nga nasamaran sang natabo ang terror attack sa Israel kag nagpaulan pa ang Iran sang missiles sa amo man nga Jewish state sang nagligad nga Myerkules sang gab-i.
Suno sa embahada, hilway sa katalagman ang tanan nga mag Pinoy kag gilayon nga nagpanago sa bomb shelters sang may ginpaguwa na nga advisory ang otoridad.
“Most Filipinos were already sheltering in place or already inside safe rooms when the shooting took place and shortly before the missile attack at about 7:30 p.m.,” pahayag sini.
Nagpasalamat man ang gobyerno sang Pilipinas sa Filipino community sa amo nga pungsod bangud sa ila kooperasyon, amo man sa Israeli Defense Forces (IDF) Homefront Command sa ila madasig nga pag-alerto sa mga tawo.
Balik na sa kinaandan nga trabaho ang mga Pilipino suno sa embahada apang nagapabilin nga alerto pananglitan may mga emerhensya.
Myerkules sang kaagahon (Manila time) sang nag-isyu ang Philippine embassy sang advisory agud nga hingyuon sa mga Pinoy nga magpabilin lang sa protected areas kasunod sang paglunsar sang Iran sang ginabanta 200 missiles kasunod man sang pagpang-atake nga ginhimo sang Lebanon.
Una na nga nagpaathag ang Iran Islamic Revolutionary Guard Corps nga ang ila missile attack ang kasunod sang kamatayon sang Gazans amo man sang mga lider sang Hezbollah kag Hamas.
Nagpaandam man ini nga pasagunsunan pa ang atake pananglitan magbalos man ang Israel.
