Nagasinggitan sang hustisya ang pamilya sang duha ka mga babaye sa Sara, Iloilo- isa ang ginpatay samtang isa ang ginhimuslan.
Ang ginbawian sang kabuhi amo si Grace Asiwagan Fortaleza, 44, samtang ang ginhimuslan naman amo ang 17-anyos nga dalagita sa Barangay Arante, Sara.
Magkaupod sa balay ang mga biktima.
Sa interview sang Bombo Radyo kay Lota Asiwagan, utod ni Fortaleza, iya ginpahayag nga ginpukaw siya sang 17 anyos nga biktima kag ginpahibalo ang natabo sa ila.
Suno kay Asiwagan, hungod nga ginsulod sang wala pa makilal-an nga tawo ang balay paagi sa pagsaka sa bintana kag didto na ginhimo ang krimen.
Ginkuha man sang suspek pati ang duha ka mga cellphones sang biktima.
Nagapadayon naman ang imbestigasyon sang Sara Municipal Police Station sa krimen.
Ginpahayag nga nakasuksok sang bonet ang suspek.
Gin-guba man sini ang CCTV sa balay.
Nakaangkon naman sang pilas sa liog ang dalagita samtang nagapanginpadlos sang ginahimuslan ini sang lalaki.
