Ginasaulog subong nga bulan sang Oktubre ang Santo Rosaryo bilang pagpakita sang pagtahod kay Birhen Maria.
Ginakabig man ini nga espesyal nga bulan para mga Katoliko bangud ginapahanumdom nga sa bulan sang Oktubre, nagakadapat nga mas hugton pa sang mga Katoliko ang pagpangamuyo sa Santo Rosaryo.
Subong man nga bulan ginasaulog ang Kapistahan sang Mahal nga Birhen sang Santo Rosaryo.
Sa interview sang Bombo Radyo kay Monsignor Meliton Oso, Director sang Jaro Archdiocesan Social Action Center (JASAC), iya ginpahayag nga nag-umpisa ang Kapistahan sang Mahal nga Birhen sang Santo Rosaryo sang 16th Century matapos ang kadalag-an sang mga Kristiyano batok sa mga Turkish Army.
May yara naman sang 15 ka misteryo ang Santo Rosaryo nga gintunga sang tatlo ka bahin nga ginalakipan sang Joyful Mysteries, Sorrowful Mysteries kag Glorious Mysteries.
Apang sang tuig 2002, gindugang ni St. John Paul II ang ginatawag nga “Luminous Mysteries”.
Ang pagpangamuyo sang Santo Rosaryo ang meditation sa kabuhi ni Hesus, halin sa iya pagkabun-ag, kabataan, pagpahayag sang kaharian sang Diyos, pag-antos, kamatayon kag liwat nga pagkabuhi.
Isa man ini ka simple, apang gamhanan nga sahi sang pangamuyo, praktikal kag nagakabagay sa anuman nga sitwasyon sa kabuhi kaangay sang pandemya kag kalamidad.
