Ginkumpirma ni President Ferdinand ”Bongbong” Marcos Jr. nga nasal-ot na sini ang isyu sa West Philippine Sea sa nagapadayon nga 44th kag 45th ASEAN Summit and Related Summits sa Laos.
Pahayag sang presidente, wala pa sini ginpatpat ang mga detalye apang nahambal na sini ang general principle nga amo ang pagtuman sa rule of law kag sa United Nations Convention on the Law of the Sea (UNCLOS).
Ginpahayag man sini nga lauman nga mas mapisa-pisa ang detalye sini nga isyu sa masunod nga inadlaw.
Kaangot gihapon ini sa padayon nga pag-angkon sang China sa teritoryo nga iya na sang Pilipinas amo man ang mga parte sang dagat nga gina-claim na sang Vietnam, Indonesia, Malaysia, kag Brunei.
Sang Martes sang katapusan na-report sang Pilipinas ang panibag-o nga water cannon attack sang China Coast Guard (CCG) vessels sa barko sang Bureau of Fisheries and Aquatic Resources (BFAR) sa Panatag (Scarborough) Shoal.
Ang ginpuntariya sang barko sang China amo ang BRP Datu Cabaylo sang malapit na ini sa Panatag 6:30 sang aga.
Nahibaluan nga ang Panatag amo ang traditional Filipino fishing ground nga nahamtang sa kalayuon nga 220 kilometros sa nakatundan sang probinsya sang Zambales.
Nahibaluan nga sa diskusyon sa Laos, magluwas nga yara ang heads of state sa Southeast Asia, yara man sanday United States State Secretary Antony Blinken, Chinese Prime Minister Li Qiang, Canadian Prime Minister Justin Trudeau, kag iban pa gid nga world leaders.#
