Magapadala sang tropa sang militar kag advanced anti-missile system ang Estados Unidos sa Israel.
Suno kay US President Joe Biden, tuyo sang deployment sang amo nga system amo nga depensahan ang Israel.
Pahayag naman ni Pentagon spokesperson Pat Ryder, ang Terminal High-Altitude Area Defense (THAAD) battery amo ang maga-augment sa integrated air defense system nga ginagamit sang Tel Aviv.
Kabahin ini dugang niya sa US military adjustments para nga suportahan ang Israel kag proteksyunan ang mga Amerikano batok sa pagpang-atake sang Iran kag sang mga militia nga kaalyado sini.
Una naman nga nagpaandam ang foreign minister sang Iran nga ginabutang sang US sa risgo ang kabuhi sang ila tawo sa militar kun ipadala sila agud mag-operate sang US missile systems sa Israel.
Matandaan nga sang Abril, nagpalupad ang Iran sang missiles kag drones sa amo nga Jewish state. Sang Oktubre 1 naman, masobra sa 200 ka ballistic missiles ang ginpaulan liwat sa Tel Aviv samtang nagalala ang tensyon batok sa Hezbollah militants.
Kadam-an sang amo nga missiles ang na-intercept sang Israel apang may iban gid nga nakalusot sa missile defenses.
