Nagkomento ang overall chairperson sang quad committee sa Kamara sa posibilidad nga si Sen. Ronald “Bato” Dela Rosa nga head sang Senate Committee on Public Order and Dangerous Drugs ang magapanguna sa imbestigasyon sa war on drugs sang Duterte administration.
Suno kay House quad-committee Chairman Robert Ace Barbers, wala man ginadumili nga pareho nga isyu ang busision sang Kamara kag Senado, apang ang daku nga pamangkot amo ‘ngaa imbestigaran ni Bato ang iya kaugalingon.’
“Since there are no prohibitions, I believe they have all the right to do that but, again, the bigger question that should be asked is ‘why would you investigate yourself in your own committee,'” suno kay Barbers.
Si Dela Rosa ang suod nga kaalyado ni former President Rodrigo Duterte. Siya man ang chief sang Philippine National Police (PNP) sang tion nga ginpatuman ang drug war.
Pahayag ni Barbers, sa House quad committee, wala man sila sang gina-akusaran kaangot sa nangin kampanya kontra sa iligal nga droga.
Bangud may mga personalidad nga gina-implicate suno sa iya, luyag lang nila nga pamatian man ang ila bahin rason nga gina-imbitar ang mamensyonar nga mga persona para nga maka-depensa.
“Since there are other personalities being implicated, we wanted to hear the other side of the coin, inviting those implicated to use this venue to share their side. Unfortunately, those that we invited have not accepted our invitation yet,” dugang sini.
Mangin si former senator Leila de Lima ang nag-kwestyon man sa plano ni Dela Rosa kaangot sa imbestigasyon. Daw kaangay lang ini suno sa iya nga siya ang akusado, apang siya man ang judge sa kaso.
“Puwede ba ‘yun akusado ka, ta’s magiging judge ka rin,” suno kay De Lima.
“There is a basic ethical issue there. Kung iba sana ang mag-preside, puwede. Pero ‘yung sila at magpa-participate sa pagtatanong pa, I don’t think that is proper… Katawa-tawa nga,” dugang sang former senator.
Una na nga ginpahayag ni Senate President Francis ‘Chiz’ Escudero nga indi siya luyag nga pangunahan ni Bato kag ni Senator Bong Go ang imbestigasyon. Tun-an man ang proposal ni Senate Deputy Minority Leader Risa Hontiveros nga itugyan ini sa Committee of the Whole.
“Well haharapin namin ‘yan sa susunod na mga araw, kokonsultahin ko ang ibang mga miyembro pero nakausap ko na si Senator Bato kaugnay niyan at ang sinabi ko sa kanya, anumang imbestigasyon na nais niya’t patungkol sa kanya mismo at kay Senator (Bong) Go, mas maganda siguro kung hindi sila manguna ng komiteng ‘yun para walang alegasyon na ito ay personal at hindi impartial at hindi fair,” kabahin sang inisyal nga pahayag ni Escudero.#
Photo by: Rambo Talabong
