Nagsugod na sa training sa Japan ang duha ka mga manghod ni two-time Olympic gold medalist Carlos Yulo nga sanday Eldrew kag Elaiza.
Suno sa ila iloy nga si Angelica Yulo, nagahanas ang duha sa idalom sang training camp ni Japanese coach Munehiro Kugimiya nga amo man ang nangin long-time coach ni Caloy antes sini nakuha ang duha ka bulawan nga mga medalya sa Olympiada.
Nagpares si Coach Mune sa iban nga Japanese company sponsors para sa training nga ginalantaw nga preparasyon na sa Los Angeles Olympics 2028.
Una na nga ginsapubliko ni Gymnastics Association of the Philippines (GAP) president Cynthia Carrion ang plano nga ilakip si Eldrew sa lineup sa Los Angeles 2028 nga posible maga-compete kaupod sa iya magulang nga si Caloy nga nagatuyo naman nga depensahan ang iya gold medals sa Summer Games.
Nahibaluan nga nagahimo naman sang pangalan si Eldrew paagi sa pagdaog sang mga medalya sa national multi-sport events samtang si Elaiza naman ang nakabulsa sang lima ka gold medals sang ginpatigayon ang Palarong Pambansa sini nga tuig.
Si Caloy nga kampyon sa floor exercise kag vault events sa Paris Games amo ang una nga Filipino gymnast nga nakadaog sang Olympic gold medal kag una man nga Pinoy nga nakabulsa sang duha gid ka gold medals sa isa lang ka edisyon sang Olympiada.#
