Nagsaka na sa 26 ka mga tawo ang na-report nga patay bangud sa paglaslas sang Severe Tropical Storm Kristine.
20 sa sini ang halin sa Bicol region santo sa kumpirmasyon ni Bicol police chief Brig. Gen. Andre Dizon nga kadam-an nabiktima sang pagkalumos kag pagkatiphag sang duta.
Kun pahat-pahaton, pito ang halin sa Naga City, lima sa Catanduanes, apat sa Albay, kag tag-isa sa Camarines Norte, Camarines Sur, Sorsogon kag Masbate.
Sa probinsya naman sang Quezon, isa ka tigulang nga babaye ang nalumos kag isa ka bata ang nahulog sa kanal kag nadala sang mabaskog nga daludo sang tubig.
Sa Planas, Masbate, isa suno sa Office of Civil Defense ang napatay bangud sa natumbahan sang kahoy.
Apang kun basehan ang data sang National Disaster Risk Reduction and Management Council (NDRRMC), pito pa lamang ang ila ginkumpirma nga ginbawian sang kabuhi kun sa diin anum ang halin sa Bicol.
Sa bulletin sang talatapan nga ginpaguwa alas otso kagab-i, gin-report nga 193,366 ka mga tawo sa bilog nga pungsod ang nagatinir sa evacuation centers, samtang 60,823 naman ang nagpuyo anay sa iban pa nila nga mga himata.
Nagsaka naman sa 231 ka mga dalan kag 26 ka taytay sa Bicol region ang nagapabilin nga indi maagyan rason nga nagakaatrasar ang paghatag sang bulig kag rescue operations.#
