Ginduso sang Egypt ang duha ka adlaw nga ceasefire sa Gaza agud nga ibaylo ang apat ka Israeli nga ginbihag sang Hamas sa mga Palestinian prisoners nga yara naman sa Israel.
Gin-anunsyo ni Egyptian leader Abdel Fattah al-Sisi ang amo nga tikang kaupod si Algerian President Abdelmadjid Tebboune sa Cairo.
Suno kay Sisi, dapat nga mag-resume na ang pag-istoryahanay sa sulod sang 10 ka adlaw nga pagpatuman sang temporary ceasefire bilang kabahin sang paninguha nga makasugtan gid ang permanente na nga pag-untat sang gyera sa Gaza Strip.
Wala pa sang ginkomento ang Israel ukon ang Hamas militants apang may pila ka Palestinian officials nga nagsiling nga nagalaum nga pamatian sang militante nga grupo ang amo nga offer.
Una na nga ginpahayag sang Hamas nga indi nila pagpangbuy-an ang nabilin nga mga bihag sa Gaza tubtub nga indi mag-isol ang mga soldado sang Israel.
