Wala sang direkta nga reaksyon si former President Rodrigo Duterte sa pahayag ni anay Senator Antonio Trillanes IV nga napadala na sa International Criminal Court ang transcript sa mga statement sang former president sa drug war hearing sa Senado.
Suno kay Duterte, wala sang ginahimo si Trillanes kundi magwakal gani indi na niya ini pagsabton.
“Walang ginawa kung hindi magdaldal. Hindi ko nga sinasagot e. Kaya di ko sasagutin,” pahayag sang anay chief executive.
Apisar wala siya nagsabat sa isyu sa drug war, ginpuno naman ni Duterte sang hikay, buyayaw kag pagpakamalaot si Trillanes kaangay sang mga tinaga nga “bobo”, “wala sang medal of valor”, “nakalusot lang sa Philippine Military Academy”, “buang-buang” kag “wala sang kontribusyon sa pungsod kundi nagahimo lang sang gamo.”
Matandaan nga sang nagligad nga semana, nag-atubang si Duterte sa hearing sang Senate subcommittee kaangot sa drug war kag extrajudicial killings kag sa sulod sang masobra walo ka oras, madamo ini sang napangbuy-an nga pahayag kag rebelasyon kaangay sa death squad kag iya mandu sa pulis sang ginpatuman ang kampanya.
Duha ka adlaw matapos ang amo nga hearing, nagsiling si Trillanes nga napadala na ang kopya sang testimoniya ni Duterte sa ICC kag tanan ini ang magamit sa trial.
Ang ICC ang naga-imbestigar sa ginaalegar nga crimes against humanity nga nahimo sang Duterte administration sa implementasyon sang kampanya kontra iligal nga droga kun sa diin linibo ka drug suspects ang napatay.
Una na nga ginpahayag ni Duterte sa atubang sang senado nga akuon sini ang tanan nga legal nga responsibilidad sa pagpatuman sang kampanya.
May ginmensyonar man si Trillanes nga ang transcripts sa House QuadComm inquiry ang napasa naman sa ICC sang nagligad nga semana.
Wala pa nakatambong si Duterte sa hearing sang quad comm, apang may mga nagtestigo na batok sa iya kaangay sa iya anay ginasaligan nga mga pulis nga sanday retired police colonel Royina Garma kag Pol. Lt. Colonel Jovie Espenido.
