Ginmandu ni Prime Minister Pedro Sanchez ang pagpadala sang dugang nga 5,000 ka mga soldado kag 5,000 man ka mga pulis sa eastern region sang Valencia sa Espanya matapos ang lapnagon nga baha.
Suno kay Sanchez, ini nga kalamidad amo ang ikaduha sa pinakamamatay nga pagbaha sa Europa subong nga siglo kag ini man ini ang pinakadaku nga deployment sang Espanya sang army kag security force personnel nga indi para sa giyera kundi bilang responde sa baha.
211 na ang numero sang nagkalamatay kun sa diin 202 ang halin sa Valencia mismo.
Nagabuligay man ang rescuers sa pagpangita sang mga bangkay sa nagsalalampaw nga mga salakyan kag nagkalabahaan nga mga building.
Indi pa matumod kun pila ang nabilin nga missing.
Antes ang panibag-o nga deployment, may yara na nga daan sang una napadala nga 1,700 ka mga soldado nga nagbulig sa search and rescue operations apisar nga naga-amat-amat na punaw ang paglaum nga may makit-an pa nga survivors.
Lakip sa ginatutukan sang army amo ang pag-pump sang tubig paguwa sa underground tunnels kag sa car parks kun sa diin ginapatihan nga may mga tawo pa nga na-trap sang nag-gulpyada saka ang tubig-baha.
Ang pag-adjust sa deployment sang mga soldado ang kasunod sang pagpakamalaot sang publiko sa gobyerno sa kulang nga pag-responde sa mga biktima.
Nahibaluan nga wala pa man naka-bangon ang mga tawo sa sini nga trahedya, may yara liwat sang ginpasaka nga weather warning sa northeastern kag southern Spain subong nga Domingo samtang may yara man sa Balearic Islands kahapon.
