Nagtimbuok pa sa P5.75 billion ang balor sang halit nga ginbilin sang Severe Tropical Storm Kristine sa sektor sang agrikultura sa pungsod.
Base sa latest reports sang Department of Agriculture (DA), lapaw sa 131,600 ka mangunguma kag mga manugpangisda ang na-displace bangud sa amo kabaskog nga bagyo kag nahalitan man ang masobra 100,000 ektarya sang ginatalauma nga duta.
Sa sini nga kalaparon, masobra sa 38,400 ektarya ang wala na gid sang tyansa nga maka-recover suno pa sa ahensya.
Ang pinakaapektado amo ang humay nga may P4.25 billion nga balor sang nahalitan ukon masobra 516,430 tonelada.
Tubtub naman sa P847 million nga balor sang high-value crops lakip na ang spices, legumes kag prutas ang nausik bangud kay Kristine.
Sa mais kag balinghoy, yara man sa P72.15 million kag P38.89 million ang balor sang kahalitan.
Sa sektor naman sang pagpangisda, yara sa P446.22 million ang balor sang damage.
Ginpahayag sang ahensya nga magahatag ini sang P541.02 million nga balor sang agricultural inputs agud ma-address ini kadaku nga halit nga ginbilin ni Kristine.
May yara man sang ginpain nga P500 million para sa survival and recovery loan program nga magapahulam sa mga mangunguma sang tubtub sa P25,000 nga sarang mabayaran sa tatlo ka tuig nga wala sang interest.
