Magapadala ang Estados Unidos sang Amerika sang B-52 bombers, fighter jets, refueling aircraft kag Navy destroyers sa Middle East.
Ini nga readjustment sang military assets ang ginhimo bangud magabiya naman ang una ginpadala nga Abraham Lincoln carrier strike group sa amo nga rehiyon.
Suno sa Pentagon, matabo ini nga deployment sa masunod nga binulan kag isa ka pagpakita sang flexibility sang U.S. military movements sa bilog nga kalibutan.
Nagpaandam man ini nga pananglitan himuon nga target sang Iran kag ila mga kaalyado ang bisan sin-o man nga American personnel o interests sa rehiyon, himuon sang Estados Unidos ang mga nagakaigu nga tikang para depensahan ang ila mga tawo.
Nahibaluan nga antes sini, may yara na sang duha ka aircraft carriers ang US sa Middle East halin sang nagsugod ang Israel-Hamas war sang Oct. 2023.
Ang latest adjustment sa U.S. forces ang kasunod sang latest nga tension sa tunga sang Israel kag Iran, magluwas pa sa away sang Israel batok sa Hamas sa Gaza kag batok sa Hezbollah sa Lebanon.
Magluwas pa gid ini sa Houthi fighters nga naka-base naman sa Yemen.
Una na nga ginpromisa sang Estados Unidos nga depensahan sini ang Israel sa anuman nga atake kag protektahan sini ang US forces sa Middle East nga gina-atake sang mga grupo nga kaalyado sang Iran sa Syria, Iraq, Jordan kag sa Yemen.
