Naka-half mast subong ang hayahay sang Pilipinas sa tanan nga government buildings bilang kabahin sang obserbasyon sang “Day of National Mourning” para sa mga biktima ni Bagyo Kristine.
Ini ang kasunod sang deklarasyon ni President Ferdinand Marcos, Jr. paagi sa Proclamation No. 728 nga napetsahan sang Oktubre 30.
Suno sa presidente, kabahin ini sang pagpakita sang simpatiya sa mga pamilya sang mga napatay bangud sa bagyo.
Ginapangabay man ang bilog nga pungsod nga maghalad sang pangamuyo para sa ikalinong sang kalag sang mga ginbawian sang kabuhi.
Base sa nakasaad sa Republic Act No. 8491 ukon ang Flag and Heraldic Code of the Philippines, kun may kaangay sini nga deklarasyon, naka-half mast ang national flag halin sa pagbutlak sang adlaw tubtub pagtunod sini kag ipatuman ang order nga ini sa tanan nga Philippine government buildings kag installations diri kag sa luwas sang pungsod.
Ginahimo ang pag-half mast sa national flag bilang pagpakita sang kalisod kun may mga trahedya nga daku gid ang impact sa nasyon.
Nahibaluan nga sa latest report sang National Disaster Risk Reduction and Management Council, nagdangat sa 146 ka mga tawo ang napatay sa Pilipinas bangud sa baha, landslides, kag iban pa nga insidente nga naangot kay Severe Tropical Storm Kristine nga may international name nga Trami.#
Photo by Michael Varcas
